Anëtari i Kryesisë së Lidhjes Demokratike të Kosovës, Festim Kabashi ka thënë se kryeministri Albin Kurti është ai që mbylli derën për një marrëveshje për presidentin dhe po e dërgon vendin në zgjedhje.
Ai ka thënë se në takimin e fundit ndërmjet Kurtit dhe Abdixhikut nuk është diskutuar për parime për zgjedhjen e presidentit, por për pazare për të cilat siç ka thënë ai ishte i interesuar Kurti.
“Në takimin e fundit të zhvilluar është diskutuar vetëm për pozita, pra interesimi i Kurtit ka qenë pozitat, nuk ka fol për parimet për zgjedhjet e presidentit. Ka pas diskutim për pazaret të cilat kryetari i LDK-së i ka refuzuar dhe ka bërë shumë mirë. Nuk është diskutuar fare për asnjë parim që do duhej të zgjidhjes presidenti i vendit”, tha Kabashi në emisionin “Këndi i Debatit” në Tëvë1.
Ai ka thënë se LDK ka qenë konstruktive dhe e gatshme për marrëveshje për një president konsensual, por edhe për një marrëveshje klasike.
Por, siç ka thënë ai Kurti doli me ofertë befasuese.
“Kjo marrëveshje nuk është diskutuar, Kurti del me deklaratë befasuese duke thënë se po i ndajmë pozitat në qeveri. Ai që dikur ka brohoritur në tërë Kosovën se të gjitha partitë politike po bëjnë pazare, në fund përfundoi duke bërë pazare”, tha ai.
LDK e PDK të hënën kanë thënë se kanë përmbyll diskutimet me Vetëvendosjen për cështjen e presidentit.
Kurti tha se LDK-së i ofroi poste në qeveri përfshirë edhe kryetarin e Kuvendit, por që u refuzuan nga LDK. Pozitën e të parit të legjislativit, Kurti ia kishte ofruar edhe PDK-së, e cila poashtu e refuzoi këtë ofertë.
28 prilli është afati i fundit për zgjedhjen e presidentit.
