Shefi i Grupit Parlamentar të PDK-së, Arian Tahiri, ka theksuar se partia e tij nuk e ka refuzuar asnjë takim me kryeministrin Albin Kurti, por ai ka qenë ai që ka refuzuar të konkretizojë iniciativën e tij përmes një letre zyrtare. Sipas Tahirit, ky ka qenë motivi që nuk kanë pasur takime mes dy liderëve politikë.
“PDK-ja s’ka refuzuar asnjë takim. Nuk ka ardhur asnjë ftesë formale për takim në adresë të PDK-së. Ne kemi shkuar në të gjitha takimet ku jemi ftuar në raundin e parë, në secilën ditë dhe në secilin vend. Pas afatit 34-ditor të Gjykatës Kushtetuese, kemi pritur katër javë të plota në raundin e dytë, dhe asnjë ftesë zyrtare nuk ka ardhur. Kështu që, mos të flasim pastaj për mesazhet e WhatsApp-it, që ishin kërkesa për pazare, të cilat, thënë butësisht, ishin qesharake,” ka deklaruar Tahiri.
Tahiri ka shtuar se për PDK-në, shteti është çështje serioze dhe se partia e tij ka kontribuar në formimin dhe ndërtimin e tij. Ai ka theksuar se zgjedhjet, nëse mbahen, janë pasojë e papërgjegjshmërisë dhe mungesës së vullnetit politik nga ana e Kurtit, i cili sipas tij dëshiron kontroll absolut institucional.
Kryeministri Kurti ka reaguar duke thënë se ka kërkuar të takohet me kryetarin e PDK-së, Bedri Hamza, por ky i fundit nuk ka pranuar. Sipas Kurtit, fillimisht Hamza kishte deklaruar se do të prisnin aktgjykimin e Gjykatës Kushtetuese, dhe më pas edhe pse ishte dërguar ftesa për takim, kjo nuk ishte pranuar nga PDK.
