Etnik Brruti po e luan sezonin e tij të fundit te skuadra e Malishevës, pasi do të largohet nga futbolli i Kosovës në verë për të vazhduar karrierën në Kroaci.
Në afatin kalimtar të verës, Brruti do të transferohet te gjiganti kroat, Hajduku i Splitit, kanë raportuar mediumet në Kroaci.
Edhe pse ishte raportuar se Brruti kishte marrëveshje me Rijekën, mësohet se Hajduku tashmë ka siguruar shërbimet e mesfushorit 22-vjeçar.
Palët tashmë kanë arritur marrëveshjen dhe Brruti me Hajdukun do të firmos kontratë trevjeçare, ndërsa ekipit kroat do ti bashkohet si lojtar i lirë pasi në fund të sezonit i skadon kontrata me Malishevën.
Brruti është njëri prej lojtarëve kyç te Malisheva por edhe ndër mesfushorët më të vlerësuar në Superligën e Kosovës.
Në sezonin aktual, Brruti ka 9 gola e 3 asistime në kampionatin e Kosovës kurse për Kombëtaren U21 të Shqipërisë ka realizuar 2 gola në 8 paraqitje.
