Deputeti i VV-së, Hysen Durmishi, ka thënë se ndjehet i turpëruar nga deklarata e kolegut të tij, deputetit Fatos Geci, i cili uroi burgim të përjetshëm për ish-presidentin Hashim Thaçi në seancën e ftuar për energjinë elektrike.
Durmishi ka thënë se lufta e UÇK-së ishte e pastër dhe çlirimtare.
“Unë ndihem i turpëruar nga deklarata e deputetit Geci! Lufta jonë ishte e pastër dhe çlirimtare! UÇK është vlera më e lartë e kombit tonë!”, ka shkruar Durmishi.
Geci, ka deklaruar në seancën e sotme se ish-Presidentin Hashim Thaçi, do ta përcjellë i njëjti fat sikurse Naim Murselin, i cili sot u dënua me burgim të përjetshëm për vrasjen e gruas së tij, Liridona Ademaj.
Atij iu tërhoq menjëherë vërejtja nga Kryeparlamentarja Albulena Haxhiu.
“Sot dua ta përshëndes vendimin e Gjykatës për dënim me burgim të përjetshëm ndaj Naim Murselit dhe ju që shpresoni se një ditë lideri juaj supres do të lirohet, do ta përcjellë i njëjti fat”, tha Geci.
Më pas i reagoi deputetja e PDK-së, Vlora Çitaku, e cila tha se deputetit Geci duhet t’i vijë turp.
