Avokati i familjes Ademaj, Leutrim Syla, ka bërë të ditur se familja e Liridonës do të parashtrojë kërkesë për marrjen e kujdestarisë së fëmijëve të saj.
Sipas Sylës, vendimi përfundimtar nëse fëmijët do t’i besohen familjes së nënës apo jo do të merret nga autoritetet e Suedisë, pasi çështja lidhet me interesin më të mirë të tyre.
Në emisionin “Ditari” në Tëvë1, ai është shprehur se vlerësimet e profesionistëve suedezë nga fushat si psikologjia, psikiatria dhe sociologjia konsiderohen si indikacione të rëndësishme që autoritetet suedeze mund ta shohin familjen Ademaj si opsionin më të përshtatshëm për rritjen e fëmijëve.
“Në çdo rast, familja e Liridona Ademaj do të parashtrojë kërkesë për marrjen e kujdestarisë së fëmijëve. Çështja nëse ata do t’i besohen familjes apo jo mbetet në kompetencë të institucioneve të Suedia, pasi kjo lidhet me interesin më të mirë të fëmijës. Deri më tani, familja e Liridonës i viziton vazhdimisht fëmijët dhe, sipas vlerësimeve të profesionistëve nga fushat e psikologjisë, psikiatrisë dhe sociologjisë në Suedi, janë dhënë sinjale se fëmijët ndihen të sigurt dhe mirë në praninë e familjes Ademaj. Këto konsiderohen si prova dhe indikacione që edhe institucionet suedeze mund ta shohin familjen Ademaj si opsionin më të përshtatshëm dhe të vetëm për rritjen e fëmijëve”, ka deklaruar Syla.
Ndryshe, Gjykata Themelore në Prishtinë, në seancën e mbajtur të martën, i ka dënuar me burgim të përjetshëm për vrasjen e Liridona Ademajt, Naim Murselin e Granit Plavën.
Kushtrim Kokalla u dënua me 30 vjet burgim.
Murseli, bashkëshorti i Ademajt, Plava e Kokalla, të cilët nuk kanë qenë prezent në sallë kur është shpallur vendimi, akuzoheshin për vrasjen e Liridona Ademajt në nëntor të 2023-ës./teve1.info/
