Ish-Presidentja e Kosovës, Vjosa Osmani, ka reaguar pas aktgjykimit me burgim të përjetshëm ndaj Naim Murselit, i dënuar për vrasjen e Liridona Ademajt, duke e cilësuar vendimin si një dëshmi se drejtësia ka folur qartë.
Në reagimin e saj, Osmani theksoi se ndonëse asnjë vendim nuk mund ta rikthejë jetën e viktimës, ky aktgjykim riafirmon rëndësinë e ndëshkimit të ashpër për krimet ndaj grave.
“Sot drejtësia foli me zë të qartë dhe të prerë. Fatkeqësisht, asnjë aktgjykim nuk e kthen kohën prapa dhe nuk e kthen Liridonën në jetë. Mirëpo sot u riafirmua një parim themelor: çdo cenim i jetës së grave kërkon përgjigjen më të fortë të drejtësisë,” ka deklaruar Osmani.
Ajo shtoi se ky vendim duhet të shërbejë si mesazh i fortë kundër dhunës ndaj grave, duke theksuar se raste të tilla nuk mund të relativizohen apo tolerohen.
“Ky vendim është një mesazh i qartë se dhuna ndaj grave nuk mund të relativizohet as të tolerohet. Por ky nuk është fundi. Është shtytja e domosdoshme që jetët e grave të mbrohen dhe çdo rast dhune të merret seriozisht e të trajtohet në kohë,” ka shkruar ajo.
Në fund, Osmani shprehu solidaritet me familjen e viktimës dhe me të gjitha familjet që kanë humbur të dashurit e tyre nga dhuna me bazë gjinore.
“Në një ditë si kjo, mendjet tona janë me familjen e Liridonës, si dhe me familjet e të gjitha grave dhe vajzave që nuk janë më në mesin tonë për shkak të femicidit. Për Liridonën. Për çdo grua që nuk arriti të mbijetojë. Dhe për çdo vajzë që meriton të rritet e lirë dhe pa frikë, drejtësia do të jetë përgjigja përherë,” përfundoi Osmani.
