“Naim Murseli e Granit Plava dënohen me burgim të përjetshëm, ndërsa Kushtrim Kokalla me 30 vite burgim”
Me duartrokitje u prit vendimi i Gjykatës Themelore të Prishtinës për të akuzuarit rreth vrasjes së Liridona Ademajt në nëntor të vitit 2023.
Me lot në sy e pritën edhe familjarët e saj.
Por këtë vendim nuk e dëgjuan ata që u dënuan, pasi Murseli, Plava e Kokalla nuk ishin të pranishëm në sallë kur ndodhi shpallja.
Si rrallë herë, në sallë ishin edhe hetuesit e Policisë së Kosovës të cilët u morën me zbardhjen e këtij rasti.
E pas vendimit, një nga një, i përqafoi vëllai i Liridonës.
Jashtë sallës së gjyqit, Leonardi iu drejtua edhe medieve.
Ai tha se janë të kënaqur me vendimin e Gjykatës.
“Ajo që u vërtetua sot është ajo që kemi thënë nga fillimi që Naimi së bashku me Kushtrimin duke e zgjedhur Granitin si vrasës e kanë organizuar këtë krim. Ky vendim nuk shkon vetëm për ne, por edhe për Liridonën dhe fëmijët e saj që nuk do ta shohin më nënën e tyre. Ky vendim është edhe për ata që mendojnë që ta bëjnë një krim të tillë. Sa i përket Kushtrim Kokallës, besoj që gjykata e ka parë të drejtë ashtu. Sado pak ky vendim na ka lehtësuar edhe neve, por është vendim që e kemi pritur të gjithë, jo vetëm familja”, ka thënë vëllau i Liridonës.
Por nga familja do të ketë apelim të dënimit për Kushtrim Kokallën.
“Edhe pse si i tillë nuk parashihet me kod pasi ishte vetëm 30 vjet në kohëzgjatje, por që duke pasur të drejtën të apelojmë edhe në Apel, konform lartësisë së dënimit, konsideroj se do të bëjmë ankesë”, u shpreh avokati i familjes Ademaj.
Sipas aktakuzës, Të tre Naim Murseli, Granit Plava e Kushtrim Kokalla dakorduar paraprakisht që vrasja të kryhej nga i akuzuari Plava me marrëveshje që Murseli t’ia paguante atij 30 mijë euro.
I gjithë plani për vrasjen e Liridonës, në aktakuzë thuhet se u bë nga bashkëshorti i saj, Naim Murseli.
