Me 81 vota për, asnjë kundër dhe 25 abstenime, Kuvendi tashmë i ka dhënë dritën e gjelbër themelimit të Byrosë për Konfiskimin e Pasurisë së Pajustifikueshme.
Megjithatë, Byroja nuk do të jetë organi përfundimtar që do të vlerësoj nëse një pasuri që nuk mund të justifikohet të konfiskohet.
Zëvendësministri i drejtësisë, Genc Nimoni, tregon se vendimin do ta marrë Gjykata.
“Procesi i verifikimit do të iniciohet nga byroja e cila natyrisht përveç që inicion, verifikon dhe analizon dhe në fund bazuar në gjetjet dhe analizat e tilla bënë propozimin për konfiskim tek Gjykata. Pastaj Gjykata do të jetë kompetente me vendim gjyqësor bazuar në provat nëse ka bazë që të konfiskohet pasuria e cila pra është në shpërputhje me të ardhurat e ligjshme të zyrtarëve publik”, ka thënë Nimoni.
Nimoni thekson se nëse gjatë verifikimit të pasurisë rezulton se pasuria ka kaluar te palë të treta, edhe ato të jenë subjekt i hetimit.
“Byroja do ta ketë komisionin kyç të përberë prej pesë anëtarëve, poashtu do ta ketë edhe drejtorin. Komisioni mbikëqyrës është përgjegjës që ta bëjë selektimin e drejtorit e pastaj drejtori do të votohet në Kuvend. Gjithçka është në përputhje me rekomandimet e komisionit të Venedikut e poashtu me aktgjykimin e Gjykatës Kushtetuese dhe me Kushtetutën e Republikës së Kosovë”, theksoj tutje Nimoni.
Të rëndësishëm këtë projektligj e sheh edhe ish kryetari i Gjykatës së Apelit, Hasan Shala.
Mirëpo ai ka disa vërejtje ndaj tij.
“Ky ligj duhet të hartohet dhe të miratohet në Kuvend me konsensus të partive politike, pasi unë mendoj që të gjitha partitë politike, ka njerëz të ndershëm, ka njerëz të pakorruptuar për më luftu korrupsionin. Nëse ish shku me konsensus të partive politike dhe zgjedhja e drejtorit të bëhet me 2/3 e votave aty do të ishte një person unfikues, i pavarur dhe i pandikuar nga politika”, u shpreh Shala.
Për rendësin e kësaj Byroje, në mbledhjen e Qeverisë foli edhe kryeministri Kurti, i cili mes tjerash tha se kjo byro do të bëhet, sepse me të sipas tij përfundimisht merr fund parulla “Rroga e vogël – fitimi i madh”.
