Aksioni policor i të shtunës- 50 lokacione të kontrolluara, 34 persona të arrestuar
Ky lokal në Vushtrri të dielën ishte i mbyllur.
Kjo meqë forca të shumta policore, zbarkuan këtu mbrëmjen e së shtunës.
Ky ishte njeri nga lokacionet në Vushtrri, i cili ishte cak i një aksioni të madh policor, nën dyshimin e organizimit të lojërave të fatit.
Por ky biznes, nuk ishte caku i vetëm i organeve të rendit të shtunën.
Edhe plot 49 lokacione të tjera u bastisën nën dyshimin e veprimtarive të kundërligjshme që ndërlidhen me organizimin e skemave piramidale dhe bixhozit të paligjshëm.
Ndërsa aksioni i përbashkët Prokurorisë Themelore të Mitrovicës dhe Policisë së Kosovës, u zhvillua edhe në Mitrovicë, Istog e Skenderaj.
E numri i të arrestuarve, ishte i madh.
“Bazuar në raportet zyrtare, gjatë këtyre operacioneve janë arritur këto rezultate: Janë arrestuar 34 persona të dyshuar. Janë kontrolluar rreth 50 lokacione të ndryshme, përfshirë lokale afariste dhe shtëpi private; Janë sekuestruar prova materiale që ndërlidhen me veprat penale, përfshirë: rreth 170,000 euro para të gatshme, pesë (5) automjete, armë zjarri, si dhe pajisje dhe materiale të tjera të përdorura për zhvillimin e aktiviteteve të kundërligjshme”, thuhet nga Prokuroria.
Tutje, nga kjo prokurori kanë bërë të ditur se me vendim të prokurorit, nga 34 personat e dyshuar, 29 prej tyre janë dërguar në mbajtje.
“Në totalin e bastisjeve/kontrolleve dhe arrestimeve janë përfshirë edhe veprimet e ndërmarra policore në Skenderaj, ku janë kontrolluar 15 lokacione të ndryshme, 8 persona janë arrestuar dhe nga ta 4 janë dërguar në mbajtje”, thuhet në komunikatë.
Në fund, nga Prokuroria Themelore e Mitrovicës, kanë ftuar qytetarët të bashkëpunojnë duke raportuar çdo aktivitet të dyshimtë tek organet e rendit.
