Kryetari i ri i Aleancës Kosova e Re, Emir Abrashi, ka deklaruar se partia do të hyjë në një fazë të thellë reformimi dhe ristrukturimi, me synimin për t’u rikthyer si një alternativë e besueshme politike në vend.
Ai ka bërë të ditur se ka marrë besimin e delegatëve për ta udhëhequr AKR-në në katër vitet e ardhshme, duke e cilësuar këtë si një përgjegjësi të madhe ndaj anëtarëve dhe qytetarëve të Kosovës.
“Me shumicë votash mora besimin për ta udhëhequr AKR-në në katër vitet e ardhshme. Ky është një nder i madh, por mbi të gjitha një përgjegjësi serioze ndaj secilit prej jush dhe ndaj qytetarëve të Kosovës”, ka shkruar Abrashi.
Ai theksoi se partia synon të ofrojë një alternativë moderne dhe të besueshme politike, përmes reformave të brendshme dhe riorganizimit.
Abrashi ka shprehur mirënjohje të veçantë për Behgjet Pacolli, të cilin e quajti President Emeritus të AKR-së, për mbështetjen dhe besimin e dhënë.
Sipas tij, bashkëpunimi me Pacollin, duke ndërthurur përvojën e tij me vizionin e ri, do të jetë kyç për rikthimin e AKR-së në institucionet e vendit si një subjekt konstruktiv dhe i përgjegjshëm.
Abrashi shtoi gjithashtu se bashkëpunimi me shoqërinë civile, pjesë e së cilës ishte deri më tani, do të vazhdojë në forma të reja, në funksion të interesit publik.
