Në hyrje të shtëpisë e kanë vendosur fotografin e tij.
E që disa ditë po presin mysafirë për ngushëllime.
Familja Dauti nga Prekazi i Epërm pas 27-vitesh, të premten që lamë pas morën informacione për eshtrat e djalit të tyre, Sinanit.
Në pranverën e vitit 1999, Sinani nëntë vjeç u vra nga forcat serbe.
E këtë moment e ka të freskët nëna e tij, Lumnija, e cila edhe ishte e plagosur.
“I kemi qitë fëmijët krejt prapa, ne kemi qenë përpara për me i mbrojte fëmijët janë hy këmbësoria, kanë gjuajtur dhe e kanë thye dritaren e jashtë ka qenë një plak më një plakë të cilët iu kanë thënë mos gjuani se veç gra dhe fëmijë ka”, shprehet ajo.
Nga plumbat e armës, Lumnijes iu plagos edhe djali.
Për ta shëruar 9-vjeçarin Lumnija tregon rrugën të cilën mori.
“Tjetri e mprehte thikën edhe kanë lyp pare dhe ari, edhe kemi dhënë atëherë na kanë hap dyert dhe jemi dal. E kam kap Sinanin para duarve, ai ka qenë dy muaj pa i bënë 9 vjet. Unë Sinanin prej këtuhit në shpinë e deri në Klinë të Ulët, aty ja kanë dhënë ndihmën e parë pastaj e kemi dërgu në Skenderaj në spital”, shprehet ajo.
Edhe sot ajo kujton fjalët e fundit të të birit.
“Sinani ka pas vetëdije të plotë, ai ka fol më ka thirr tri herë nanë, nanë, nanë, tashti po më dhemb”.
E për vite më radhë familja Dauti nuk kishin asnjë informatë për Sinani, ndonëse gjithmonë ishin me mendje tek ai.
“Përveç që pat fatin e keq që u plagos dhe humbi jetën për shtatë vite më radhë gjithmonë e kemi pas mendjen se ku ndodhet se qysh i ka ardhur momenti i fundit mendjen e kemi pas gjithë”, tha djali i xhaxhait të Sinanit, Anton Dauti.
Të shtunën, eshtrat e Sinan Dautit pritet që të rivarrosen në Prekaz.
