Agjencia për Parandalimin e Korrupsionit këtë të premten bëri publikimin e pasurisë të zyrtarëve publikë.
Nga këto të dhënë ushtruesja e detyrës së presidentes së Kosovës Albulena Haxhiu, të hyra vjetore ka mbi 24 mijë euro.
Sa i përket pronave, Haxhiu të deklaruar ka një banesë në pronësi të përbashkët në vlerë prej 118 mijë euro.
Ndërsa në emër të bashkëshortit një banesë prej 82 metrash katror në vlerë 60 mijë euro dhe një tokë prej 6 ari në vlerë 15 mijë euro.
Sa i përket parave të gatshme në llogari të deklaruara ka 1531 euro.
Gjithashtu një kredi në vlerë prej 160 mijë eurosh.
Ndërsa sa i përket kryeministrit Albin Kurtit, të hyrat vjetore të deklaruara janë 21 mijë e 315 euro nga paga si kryeministër.
Ai gjithashtu i ka deklaruar edhe të hyrat e bashkëshortes nga paga në vlerë prej 51 mijë eurosh.
Në bazë të formularit të publikuar Kurti ka në llogarinë e tij bankare 16.41 euro.
Ndërsa në emër të bashkëshortes në bankë ka 19 mijë e 500 me prejardhje nga paga dhe trashëgimi nga prindi, 2 mijë euro kursime të vajzës dhe 50 euro tjera të vajzës.
Si pasuri të paluajtshme, Kurti ka përmendur banesën e bashkëshortes, në vlerë 530 mijë euro.
Ndërkaq borxhe, ka deklaruar kredinë e bashkëshortes në vlerë të mbetur 160 mijë euro, dhe ka renditur qiranë e banesës që tash ka deklaruar se e paguan 350 euro.
E kryetari i PDK-së Badri Hamza në deklarimin vjetor të pasurisë ka njoftuar se posedon dy banesa.
Një nga banesat me sipërfaqe 120 metër katror në vlerë 70 mijë euro dhe një më sipërfaqe 98 metër katror në vlerë 46 mijë euro.
Në pronësi të deklaruara ka edhe tri garazhe në vlerë 14 mijë e 700 euro së bashku.
Gjithashtu ka deklaruar se ka një hektar tokë në vlerë 50 mijë euro dhe një shtëpi prej 72 metrash katror në vlerë 25 mijë euro.
Ndërkohë në emër të bashkëshortes ai ka deklaruar një banesë prej 60 metrash katror në vlerë prej 39 mijë euro.
Para të gatshme ai ka deklaruar se ka mbi 10 e 700 euro në një llogari dhe 1408 euro në një llogari tjetër.
Ai ka deklaruar të ardhura vjetore personale në vlerë prej afër 19 mijë e 700 euro.
Ndërsa kryetari i LDK-së Lumir Abdixhiku, ka deklaruar si pasuri të paluajtshme një shtëpi në vlerë 150 mijë euro që ka thënë se e ka të trashëguar.
Si pronë të përbashkët ai ka deklaruar një shtëpi në vlerë 200 mijë euro dhe një banesë në vlerë 265 mijë euro.
Ndërkohë që ka deklaruar edhe dy banesa në emër të bashkëshortes.
Para të gatshme në llogari Abdixhiku ka deklaruar se i ka 386 euro në një llogari bankare nga paga dhe kursimet si dhe 4915 euro në një llogari tjetër bankare nga paga.
Abdixhiku ka deklaruar të hyra vjetore dy paga atë si deputet dhe nga kolegji “Riinvest”, të parën në vlerë 16 mijë e 889 euro dhe dytën në vlerë 24 mijë euro.
