Ish-presidentja e Kosovës, Vjosa Osmani, ka reaguar pas vendimit të Kuvendit të Kosovës për angazhimin e Forcës së Sigurisë së Kosovës (FSK) në misionin ndërkombëtar në Gaza, duke bërë thirrje për ratifikimin urgjent të marrëveshjes për anëtarësimin në “Bordin e Paqes”.
Kuvendi miratoi këtë vendim me 89 vota pro, duke dëshmuar, sipas Osmanit, unitet shtetëror për një hap të rëndësishëm në politikën e jashtme dhe të sigurisë.
Në reagimin e saj, Osmani theksoi se ky angazhim është në përputhje me zotimet ndërkombëtare dhe forcon rolin e Kosovës në skenën globale, duke e rreshtuar atë krah për krah me Shtetet e Bashkuara të Amerikës dhe aleatët e tjerë strategjikë.
Ajo nënvizoi se përfshirja e FSK-së në misionin e Forcës Stabilizuese Ndërkombëtare (ISF) në Gaza rrit besueshmërinë ndërkombëtare të Kosovës dhe kontribuon në avancimin e kapaciteteve profesionale të forcave të sigurisë, si dhe në afrimin drejt synimit për anëtarësim në NATO.
“U bëj thirrje të gjithëve që, me urgjencë dhe në mënyrë unanime, të ratifikojnë marrëveshjen për anëtarësimin e Kosovës në Bordin e Paqes, si një mekanizëm i domosdoshëm politik për koordinimin e këtij misioni ushtarak”, ka deklaruar Osmani.
Sipas saj, kjo marrëveshje do të forcojë sigurinë shtetërore, do të garantojë përfaqësim të barabartë dhe do të krijojë mundësi të reja për thellimin e bashkëpunimit ndërkombëtar dhe avancimin e njohjeve të reja.
Në fund, Osmani ka shprehur mirënjohje të veçantë ndaj SHBA-së për mbështetjen dhe besimin e vazhdueshëm ndaj Kosovës, duke theksuar se vendi mbetet i përkushtuar për paqe dhe stabilitet global.
