Peja dhe Golden Eagle Ylli do të përballen sot në mbrëmje në ndeshjen e dytë çerekfinale të fazës “play-off” në Superligën e Kosovës në basketboll.
Ndeshja luhet në palestrën “Karagaçi” në Pejë me fillim nga ora 20:00 dhe mund të jetë e fundit e kësaj serie.
Ylli fitoi vikendin e shkuar në Suharekë dhe i duhet vetëm edhe një fitore për të siguruar gjysmëfinalen, ku e pret Trepça.
Megjithatë, Peja synon ta mposht Yllin për të barazuar serinë në 1:1, duke siguruar edhe ndeshjen e tretë, në të cilën gjysmëfinalisti do të përcaktohet në Suharekë.
Skuadra e Yllit do të jetë e hendikepuar në këtë përballje, pasi Lis Shoshi është i suspenduar për shkak se në duelin e parë u ndëshkua me gabim teknik diskualifikues për sjellje josportive.
