Drejtoresha e Qendrës Kosovare për Rehabilitimin e të Mbijetuarve të Torturës, Feride Rushiti, ka bërë thirrje për angazhim të vazhdueshëm institucional në mbështetje të të mbijetuarve të dhunës seksuale të luftës në Kosovë.
Rushiti ka theksuar se shumë të mbijetuar vazhdojnë të jetojnë nën peshën e heshtjes, stigmës dhe paragjykimit, pa kërkuar drejtësi apo njohje institucionale.
“Sot po nderojmë qindra zëra të heshtur, të cilët ende nuk kanë guximin të flasin dhe të kërkojnë drejtësi. Po nderojmë gra, vajza, burra dhe djem që kanë përjetuar këtë krim të rëndë gjatë luftës,” ka thënë Rushiti gjatë një ceremonie simbolike të ndezjes së qirinjve në Kuvendin e Kosovës.
Ajo ka vlerësuar rëndësinë simbolike të ndezjes së qirinjve, duke theksuar se ky akt përfaqëson jo vetëm kujtesë, por edhe krijimin e një hapësire të sigurt për të diskutuar hapur për këto krime.
Në fjalën e saj, Rushiti ka përmendur edhe guximin e të mbijetuarve që kanë folur publikisht, duke theksuar se rrëfimet e tyre kanë ndihmuar në thyerjen e tabuve dhe në ndërgjegjësimin e shoqërisë se dhuna seksuale gjatë luftës ka prekur si gratë, ashtu edhe burrat dhe djemtë.
Ajo u bëri thirrje deputetëve që të angazhohen për avancimin e legjislacionit dhe politikave që mbështesin të mbijetuarit.
“Ky është një zotim për të punuar për ligje dhe politika që ndihmojnë në shërimin e plagëve të tyre dhe për të qenë zëri i atyre që për shumë kohë nuk janë dëgjuar”, është shprehur ajo.
Rushiti ka theksuar se, edhe 27 vjet pas luftës, shumë të mbijetuar vazhdojnë të jetojnë në margjina, ndërsa paralajmëroi për pasojat afatgjata të traumës, e cila mund të bartet ndër breza nëse nuk trajtohet si duhet.
Në përfundim, ajo ka vlerësuar bashkëpunimin institucional dhe theksoi se aktivitetet e tilla krijojnë shpresë të re për të mbijetuarit, duke u dhënë atyre mundësinë që zëri i tyre të dëgjohet.
