Tashmë është dhënë drita e gjelbër për dërgimin e Forcës së Sigurisë së Kosovës në misionin në Gaza.
Komisioni për Siguri dhe Mbrojtje ka miratuar këtë duke e shtuar në rend dite në seancën e së premtes në Kuvendin e Kosovës, ku pritet për miratim.
Anëtari i këtij Komisioni, Enver Dugolli vlerëson se është historike për ushtrinë e Kosovës të marrë pjesë në këso operacionesh.
“Me këtë i hapet rrugë një zhvillimi jashtëzakonisht të rëndësishëm edhe për shtetin e Kosovës, por sidomos për FSK-në e cila po merr pjesë për herë të parë me një mision të tillë pra të paqbërjes sepse misione humanitare ka pasë edhe në të kaluarën por ky është mision krejtësisht tjetër dhe jemi jashtëzakonisht të lumtur”, ka thënë Dugolli.
Përpos hapave ligjorë, ai tregon se janë bërë edhe ushtrimet e përgatitjet e nevojshme paraprake.
“Trajnimet kanë ndodhmë tashmë kanë përfundu sepse FSK ka zhvillu trajnime edhe në faza përgatitore për misione të tilla dhe pjesëtarët e FSK-së janë më të trajnuar, të gjitha planifikimet edhe operative edhe logjistike në bashkëpunim me aleatët tanë sidomos me SHBA janë përfundu”, ka thënë tutje Dugolli.
E ish-atasheu ushtarak në Gjermani, Xhavit Sadrijaj thotë se ushtria është e gatshme dhe e trajnuar vazhdimisht për këso misionesh.
“Asnjë dilemë tjetër nuk ekziston aty pos përgatitjeve teknike dhe ato logjistike për të marrë pjesë në këtë mision dhe jam shumë i bindur se do të jetë ndër forcat më të suksesshme në rajon sepse kemi përvoja ose ka FSK-ja përvoja të mëdha në këtë drejtim, ka marrë pjesë, është trajnuar mjaft dhe ka përvoja të mëdha në bashkëpunim ndërkombëtar me ushtritë tjera, kështu që nuk është diçka e re dhe e papritur për Forcën e Sigurisë së Kosovës”, u shpreh Sadrijaj.
Sipas tij, aktualisht duhet vetëm njohja paraprake me terenin ku do të shërbejnë ushtarakët.
“Vetëm njohja me terenin që mund të bëhet përmes hartave, përmes mundësive tjera teknologjike që tashmë ekzistojnë ato ndoshta më herët është dashtë të vizitohet drejtpërdrejt vendi i ngjarjes por tash nuk është i domosdoshëm sepse ekzistojnë mundësi tjera teknologjike, plus tjerash kjo bëhet në bashkëpunim me forcat tjera ndërkombëtare dhe udhëheqësit e këtij misioni sigurisht se do të takohen në nivelin më të lartë edhe vendor dhe ndërkombëtar për t’i marrë direktivat konkrete me këtë detyrë dhe të jenë sa më të gatshëm, të përgatitur për kryerjen e detyrës”, ka theksuar Sadrijaj.
Kosova është në mesin e pesë shteteve që janë zotuar për angazhim në këtë mision me qëllim ofrimin e sigurisë dhe mbikëqyrjen e armëpushimit në Rripin e Gazës.
