Grupi libanez Hezbollah nuk do t’i përmbahet asnjë marrëveshjeje që mund të rezultojë nga bisedimet e drejtpërdrejta Liban-Izrael në Shtetet e Bashkuara , negociata të cilave ai i kundërshton fuqimisht, tha të hënën një zyrtar i lartë i Hezbollahut.
Wafiq Safa, një anëtar i lartë i këshillit politik të Hezbollahut, foli në prag të bisedimeve të pritura në Uashington midis ambasadorëve libanezë dhe izraelitë në SHBA. Do të jetë hera e parë në dekada që të dërguarit nga Libani dhe Izraeli, të cilët nuk kanë marrëdhënie diplomatike, takohen ballë për ballë në bisedime të drejtpërdrejta.
“Sa i përket rezultateve të këtyre negociatave midis Libanit dhe armikut izraelit, ne nuk jemi aspak të interesuar dhe as të shqetësuar për to”, tha Safa për Associated Press.
“Ne nuk jemi të detyruar nga ajo për të cilën ata bien dakord”, shtoi ai në një intervistë të rrallë me mediat ndërkombëtare. Ai foli pranë një varreze ndërsa një dron izraelit fluturonte sipër kokës.
Një raport i transmetuar nga mediat izraelite tha se Izraeli do të paraqes si kusht për paqe në negociata që Bjeruti t’i miratojë një zonë ushtarake në Libanin jugor.
Veçmas, në bisedimet e paqes SHBA-Iran të mbajtura fundjavën e kaluar në Pakistan , Irani është përpjekur të përfshijë Libanin në çdo marrëveshje armëpushimi të vetën me SHBA-në. Izraeli dhe SHBA-të kanë këmbëngulur që Libani nuk do të jetë pjesë e saj.
Disa orë pasi Teherani dhe Uashingtoni njoftuan një armëpushim të mërkurën e kaluar, Izraeli nisi më shumë se 100 sulme ajrore në të gjithë Libanin, duke përfshirë zonat e dendura rezidenciale dhe tregtare të Bejrutit qendror.
