Një nënë palestineze në Gaza është ribashkuar me vajzën e saj të mitur pas dy vitesh ndarje gjatë luftës, duke i dhënë fund një kërkimi që ajo tha se ishte nxitur nga besimi se fëmija kishte mbijetuar.
Sundus Al-Kurd tani e mban pranë vajzën e saj Bisan jashtë një tendë modeste në Deir al-Balah në Gazën qendrore, duke e përqafuar fort sikur të kishte frikë ta humbiste përsëri.
«Kur më thanë se ishte gjallë, nuk mund ta besoja. Ndjeva sikur jeta më ishte rikthyer përsëri», tha Al-Kurd.
Fëmija, ende e panjohur me nënën e saj, e shikon atë në heshtje, me ngurrim, por duke i afrohet gradualisht.
Historia e Al-Kurd filloi më 22 tetor 2023, kur ajo ishte tetë muajshe shtatzënë në shtëpinë e saj në Jabalia në Gazën veriore përpara se një sulm izraelit t’i ndryshonte jetën.
“Humba nënën, babanë, motrën dhe vajzën time të vogël në atë moment”, tha ajo.
E plagosur rëndë, ajo u dërgua në Spitalin Al-Shifa, ku iu nënshtrua një lindjeje cezariane urgjente.
I porsalinduri i saj u vendos në kujdes intensiv midis foshnjave të parakohshme.
Menjëherë pas kësaj, ndërsa forcat izraelite përparuan drejt spitaleve dhe më vonë hynë në Al-Shifa në nëntor 2023, ajo u detyrua të largohej ndërsa ishte ende e plagosur, duke e ndarë nga foshnja e saj.
“Qava aq shumë. Nuk doja ta lija, por më thanë se isha në rrezik dhe se ajo do të ishte mirë”, tha ajo.
Pasi spitali u bastis nga ushtria izraelite, foshnjat e parakohshme u transferuan në Gazën jugore dhe më vonë në Egjipt për trajtim. Që nga ajo pikë, Al-Kurd filloi një kërkim të pandërprerë, duke ndjekur çdo pistë që mund ta çonte atë tek vajza e saj.
Kjo shpresë u bë realitet kur të afërmit në Egjipt gjetën të dhëna spitalore në qytetin El Arish që konfirmonin identitetin e fëmijës.
”Kur më thanë se ishte gjallë, nuk mund ta besoja”, tha ajo, duke bërë një pauzë ndërsa përqafoi përsëri të bijën.
Tani të ribashkuar, Al-Kurd po ndërton ngadalë një lidhje me Bisanin.
“Bisani nuk më njeh ende, por unë do ta bëj këtë të ndodhë. Do t’i them se jam nëna e saj dhe se e kam pritur gjatë gjithë kësaj kohe”, tha ajo./Anadolu
