Një qëndrim të tillë ky Komision e ka bërë të ditur në një konferencë për media përmes zëdhënëses për çështje të fqinjësisë dhe zgjerimit Ana Pisonero.
“Ne kuptojmë se disa shtete anëtare vazhdojnë të kenë shqetësime rreth çështjeve si lufta kundër korrupsionit,kërkesat e rrejshme për azil dhe siguria e dokumenteve, që janë mbuluar nga udhërrëfyesi. Komisioni mbetet i gatshëm që të mbështesë punën shtesë mes shteteve anëtare dhe autoriteteve të Kosovës për t’i adresuar këto çështje. Ne nuk po flasim për ndonjë udhërrëfyes të ri”,ka deklaruar Ana Pisonero – zëdhënëse e Komisionit Evropian.
Kjo deklaratë erdhi pasi komisionari i Bashkimit Evropian për Fqinjësi dhe Zgjerim, Oliver Verhelyi, propozoi një udhërrëfyes të ri për heqjen e vizave.
E në rast se propozimi i Varheleyit për udhërrëfyesin do të miratohej nga Komisioni Evropian, atëherë sipas njohëses së çështjeve politike, Magbule Shkodra, do të tregonte paaftësinë e Bashkimit Evropian për vendimmarrje.
Ndërsa, politologu Fidan Ukaj, tha se Gjermania do ta kundërshtojë këtë propozim dhe se Kosova deri në fund të vitit do të marrë liberalizimin e vizave.
Për këtë propozim ka reaguar edhe ish-ambasadori i Holandës në Kosovë, Robert Bosch, i cili e ka quajtur të pakuptimtë deklaratën e komisionierit për Zgjerim, Oliver Varhelyi.
Raporti i gazetarit Valmir Gallopeni.
