Kuvendi i Kosovës miratoi sot me votim unanim një rezolutë për mbrojtjen e viktimave dhe të vërtetën historike të luftës së Kosovës në vitet 1998-1999.
Pas miratimit të rezolutës, nënkryetarja e Kuvendit nga radhët e PDK-së, Vlora Çitaku ka theksuar se Kuvendi foli njëzëri për të vërtetën historike dhe dinjitetin e viktimave.
Ajo ka shtuar se vendimi dëshmon respektin për historinë dhe sakrificën e popullit kosovar.
“Sot, Kuvendi i Kosovës u ngrit mbi dallimet politike dhe foli me një zë për të vërtetën dhe dinjitetin e viktimave të luftës. Me votimin unanim të rezolutës së propozuar nga PDK, u dëshmua se kur bëhet fjalë për historinë dhe sakrificën tonë, uniteti është i mundur dhe i domosdoshëm”. ka shkruar Çitaku në Facebook.
Ajo ka falënderuar deputetët që mbështetën rezolutën, duke theksuar përgjegjësinë dhe respektin për viktimat e luftës.
“Me solemnitetin që kërkon kjo çështje, ky vendim duhet të shërbejë si standard për çdo trajtim të historisë sonë. Ekspozita e fundit në shesh le të jetë hera e fundit që provohet të tjetërsohet e vërteta jonë historike”, ka përfunduar jo.
Ndryshe, rezoluta e propozuar nga Partia Demokratike e Kosovës u miratua me 90 vota për, asnjë kundër dhe asnjë abstenim.
