Ministri i Infrastrukturës dhe Transportit, Dimal Basha, ka realizuar një vizitë pune në terren përgjatë aksit rrugor Kijevë–Pejë, një projekt kyç për zhvillimin ekonomik dhe përmirësimin e qarkullimit në vend.
Sipas njoftimit zyrtar të ministrisë, gjatë vizitës, Basha është informuar nga afër mbi ecurinë e punimeve në segmentet kryesore të projektit dhe ka zhvilluar takime me përfaqësues të operatorëve ekonomikë dhe mbikëqyrësit e punimeve.
Në fokus të diskutimeve ishin dinamika e realizimit të punimeve, respektimi i afateve dhe adresimi i sfidave në terren.
Ministri ka kërkuar angazhim të shtuar nga të gjithë operatorët e përfshirë, për përmbushje të plotë të obligimeve kontraktuale dhe realizim të punimeve sipas standardeve të kërkuara të cilësisë.
“Projekti i rrugës nacionale N9 Prishtinë–Pejë mbetet një nga projektet prioritare të Ministrisë, me ndikim të drejtpërdrejtë në zhvillimin ekonomik dhe lidhjen më të mirë ndërmjet rajoneve”, theksohet në njoftimin zyrtar.
