Prokuroria Speciale e Kosovës ka sqaruar se hedhja poshtë e kallëzimit penal të Lidhjes Demokratike të Kosovës (LDK) ndaj kryetarit të Mitrovicës, Faton Peci nuk lidhet me hetimet për keqpërdorim të granteve në bujqësi.
Në njoftimi zyrtar thuhet se, rasti ka të bëjë me ushtrimin e dy funksioneve në Kuvend dhe Qeveri, dhe jo me keqpërdorimin e granteve.
Peci kishte bërë me dije mëngjesin e sotëm se Prokuroria kishte hedhur poshtë kallëzimin e LDK-së, i cili lidhej me kohën kur ai ishte ministër i Bujqësisë.
“Prokuroria Speciale e Republikës së Kosovës sqaron opinionin publik se rasti për të cilin po raportohet se është hedhur kallëzimi penal ndaj F.P., nuk ndërlidhet me hetimet që janë duke u zhvilluar lidhur me dyshimet për keqpërdorim të granteve në sektorin e bujqësisë. Rasti në fjalë ka të bëjë me një kallëzim penal të paraqitur nga subjekti politik LDK, i cili ndërlidhet me çështjen e ushtrimit të dy funksioneve në Kuvendin dhe Qeverinë e Kosovës”, thuhet në reagimin e Prokurorisë.
Prokuroria thekson se do të vazhdojë të informojë publikun në mënyrë të saktë dhe transparente, duke ruajtur integritetin e procedurave hetimore.
Prokuroria hedh poshtë kallëzimin penal të LDK-së ndaj ish-ministrit Peci
