Në Gjykatën Themelore në Prishtinë ka nisur seanca gjyqësore ndaj ish-zyrtares së Misionit të OSBE-së në Kosovë, Jelena Gjukanoviq, e akuzuar për veprën penale të spiunazhit.
Në këtë seancë pritet që palët të paraqesin fjalët e tyre hyrëse.
Ndryshe, Prokuroria Speciale e Republikës së Kosovës kishte ngritur aktakuzë ndaj Gjukanoviqit më 4 shtator 2025, duke e akuzuar atë për bashkëpunim me Agjencinë për Inteligjencë dhe Siguri të Serbisë (BIA), të cilës dyshohet se i ka ofruar informacione të ndjeshme.
Sipas aktakuzës, e pandehura dyshohet se, nga një datë e pacaktuar deri më 28 shkurt 2025, kur edhe është arrestuar, në cilësinë e zyrtares së OSBE-së, ka ndërmarrë veprime të përsëritura që përbëjnë ndihmë aktive për një shërbim të huaj informativ, konkretisht për BIA-n.
Ajo ngarkohet se ka siguruar dhe shpërndarë dokumente dhe informacione konfidenciale në interes të inteligjencës serbe.
