Inspektorati Policor i Kosovës (IPK) ka njoftuar se të mërkurën është arrestuar një zyrtar policor jashtë detyrës dhe në rroba civile, me dyshimin se ka kryer veprën penale “lëndim i rëndë trupor”.
Sipas IPK-së, arrestimi lidhet me një incident që kishte ndodhur në rrugën “Dervish Qollaku” në Prishtinë, ku ishte raportuar një përleshje mes disa personave dhe dyshohej përfshirja e zyrtarit policor.
Prokuroria Themelore në Prishtinë i ka caktuar masën e ndalimit prej 48 orësh.
“Hetuesit e IPK-së janë njoftuar nga Policia e Kosovës për një incident në Prishtinë pas mesnatës ku dyshohej se ishte përfshirë një zyrtar policor jashtë detyrës zyrtare. Incidenti fillimisht ishte raportuar në Polici si rrahje në progres në rrugën “Dervish Qollaku” në Prishtinë në mes disa personave e ku dyshohej se në këtë rast është përshirë edhe zyrtari policor. Pas pranimit të informacioneve hetuesit e Inspektoratit Policor i janë përgjigjur thirrjes dhe kanë dalë në vendin e ngjarjes. Pas ndërmarrjes së disa veprimeve hetimore, është arrestuar zyrtari policor (jashtë detyrës zyrtare dhe në rroba civile) me dyshimin se ka kryer veprën penale “Lëndim i rëndë trupor” të cilit me vendim të Prokurorisë Themelore në Prishtinë i është caktuar masa e ndalimit për 48 orë”, thuhet në njoftim.
IPK ka rekomanduar suspendimin e përkohshëm të zyrtarit për të garantuar paanshmërinë dhe pavarësinë e hetimeve.
“Hetuesit e IPK-së në konsultim të vazhdueshëm me prokurorin përgjegjës pritet të ndërmarrin edhe veprime të tjera hetimore lidhur me këtë rast për të sqaruar rrethanat e këtij incidenti”, theksohet në fund të njoftimit./teve1.info/
