Kosova po përjeton ethet e finales historike të “play-off”-it, dhe mobilizimi është i jashtëzakonshëm.
Këtij entuziazmi kombëtar i janë bashkuar sot edhe stafi i Ambasadës së SHBA-së në Kosovë dhe ambasadorja izraelite në Kosovë, Tammy Ziv.
Ambasadorja e Izraelit në Kosovë, Tammy Ziv, ka shprehur mbështetjen e saj për ekipin kombëtar të futbollit të Kosovës në prag të ndeshjes së rëndësishme kundër Turqisë.
Përmes një postimi në “X”, ambasadorja Ziv dhe mesazh ikurajues dhe uroi “Dardanët” për sukses në këtë përballje vendimtare kualifikuese për Kupën e Botës 2026, që do të mbahet në Shtetet e Bashkuara të Amerikës, Kanada dhe Meksikë.
Ajo vlerësoi përkushtimin dhe punën ekipore të futbollistëve, duke theksuar se këto cilësi duhet të reflektohen edhe në fushë gjatë ndeshjes së sontme në Prishtinë.
“Puna juaj në grup, përkushtimi dhe shpirti juaj le të shkëlqejnë në fushë. I gjithë kombi po ju brohoret”, thuhet në mesazhin e saj.
Kështu edhe stafi i Ambasadës së SHBA-së në Kosovë, dëshmuan se janë “Dardanët” më të rinj në kryeqytet.
Në një foto vërtet emocionuese, dhjetëra punonjës të ambasadës (si ata kosovarë, ashtu edhe amerikanë) shihen të mbledhur së bashku, duke pozuar me shallet dhe bluzat blu e verdhë të kombëtares.
Ky gjest i fuqishëm simbolizon mbështetjen e palëkundur të SHBA-së për Kosovën, jo vetëm në aspektin politik, por edhe në atë sportiv, duke treguar se sonte, çdo zemër që rreh në Prishtinë po lutet për një fitore historike ndaj Turqisë.
Ndeshja historike mes Kosovës dhe Turqisë zhvillohet sonte në stadiumin “Fadil Vokrri”, nga ora 20:45.
Një fitore eventuale e Kosovës sot, vlen një vend në Kampionatin Botëror të futbollit 2026.
