Anëtari i LDK-së, Paris Guri, ka deklaruar se partia e tij ka qenë e gatshme që nga fillimi për të gjetur një zgjidhje lidhur me çështjen e presidentit.
Ai theksoi se vendi nuk ka nevojë të shkojë në zgjedhje të reja, duke rikujtuar se Kosova tashmë ka humbur një vit pa institucione funksionale.
I ftuar në emisionin “Ditari” në Tëvë1, Guri u shpreh se nuk janë të nevojshme 85 vota për zgjedhjen e presidentit, duke shtuar se kryeministri Albin Kurti po gabon me këtë qëndrim.
Ai gjithashtu potencoi se nuk është e shëndetshme për demokracinë që një parti të mbajë tri pozitat kryesore të shtetit.
Në fund, Guri u shpreh optimist se çështja e presidentit do të zgjidhet dhe institucionet do të vazhdojnë punën e tyre.
“LDK prej fillimit të këtij procesi kur kanë mbaruar zgjedhjet e 28 dhjetorit ka qenë e hapur për ta gjetur një zgjidhje, për arsye se ne kemi pasur edhe vitin 2025, një vit pa institucione domethënë Kosovës i vyen institucione stabile dhe nuk ka nevojë për zgjedhje të reja, përgjegjësia kryesore për zgjedhjen e presidentit i takon LVV-së. LDK është e hapur për një kompromis ashtu siç ka qenë prej fillimi për zgjedhjen e presidentit, nuk duhen 85 veta për me zgjedh presidentin, kryeministri ka gabuar dhe gabon sa herë përmend 85-shin, Kurti nuk mund t’i ketë tri pozita kyçe të shtetit për arsye se është në dëm të demokracisë, nuk i shërben demokracisë së Kosovës. Prapë po shpresoj që të zgjidhet qështja e presidentit, të vazhdojmë të punojmë për zhvillimin e Kosovës”, ka deklaruar Guri./teve1.info/
