Dogana e Kosovës ka zbuluar dhe sekuestruar 1000 litra etanol (alkool i koncentruar 96%) në rajonin e Prizrenit, që dyshohet se ishte futur në qarkullim ilegal për t’iu shmangur detyrimeve fiskale.
Sipas njoftimit, njësitet antikontrabandë kanë realizuar dy aksione të ndara, ku fillimisht kanë ndaluar një automjet transportues në të cilin janë gjetur 500 litra etanol pa dokumentacion përkatës. Personat e përfshirë nuk kanë arritur të dëshmojnë origjinën, importin ligjor apo pagesën e taksave për mallin.
Pas veprimeve të mëtejshme hetimore, është zbuluar edhe një sasi tjetër prej 500 litrash, e fshehur në garazhin e një shtëpie në të njëjtin rajon.
Dogana bën të ditur se e gjithë sasia e sekuestruar dyshohet të ketë origjinë nga Serbia dhe nuk shoqërohej me dokumentacion të rregullt.
Sipas vlerësimeve fiskale, shmangia nga akciza, taksat doganore dhe TVSH-ja arrin në rreth 6,260 euro, duke i shkaktuar dëm buxhetit të Kosovës dhe duke krijuar konkurrencë të padrejtë në treg.
Rasti është duke u hetuar dhe ndaj të dyshuarve pritet të ndërmerren veprime ligjore në përputhje me legjislacionin në fuqi./teve1.info/
