Mbetje eshtërore që dyshohet se i përkasin së paku një personi të zhdukur gjatë luftës në Kosovë janë gjetur gjatë gërmimeve të realizuara në Rahovec.
Sipas Policisë së Kosovës, zbulimi është bërë nga njësitë kompetente gjatë punimeve në terren, ndërsa mbetjet janë dërguar për ekzaminime në Institutin e Mjekësisë Ligjore.
“Nga njësitë kompetente policore dhe institucionet përkatëse janë vazhduar punimet në vendin e cekur, dhe gjatë gërmimeve janë gjetur mbetje eshtërore, të cilat dyshohet se i përkasin së paku një individi, i cili figuron në listën e personave të zhdukur me forcë gjatë luftës së fundit në Kosovë 1998-1999”, thuhet në raportin e policisë.
Autoritetet kanë bërë të ditur se procesi i identifikimit do të vazhdojë përmes analizave mjekoligjore, me qëllim të përcaktimit të identitetit të viktimës.
Ndërkohë, çështja e personave të zhdukur vazhdon të mbetet një nga plagët më të rënda të pasluftës në Kosovë. Sipas të dhënave, gjatë vitit 2025 janë kryer gërmime në 33 lokacione të ndryshme, ku janë gjetur mbetje mortore të 22 individëve.
Aktualisht, edhe 1 mijë e 577 persona konsiderohen ende të zhdukur nga lufta e viteve 1998-1999, shumica prej tyre shqiptarë.
Së fundi, më 27 shkurt në Klinë janë rivarrosur mbetjet mortore të tre viktimave të luftës – Bali (Pajazit) Gashi, Fadil (Shaban) Elezaj dhe Masar (Ymer) Dushi, të identifikuar përmes analizës së ADN-së, pasi ishin zhvarrosur nga një varrezë masive në Bishtazhin.
