Deri në 1 euro e 71 cent ka arritur gjatë vikendit çmimi për litër të naftës në Kosovë.
Kjo si pasojë e konfliktit në Lindjen e Mesme që ka nisur tash e disa javë.
Andaj po vlerësohet se edhe nëse ekziston vullneti, institucionet nuk mund të ndërmarrin hapa në uljen e këtyre çmimeve.
Anëtari i Komisionit Parlamentar për Ekonomi, Ferat Shala vlerëson se mosfunksionimi i Kuvendit vështirëson ndërmarrjen e hapave si heqja e akcizës për naftën.
“Ne e kuptojmë që në këtë pozicion të ekonomisë sonë gjegjësisht të skemës fiskale, të TVSH-së, të akcizës e vështirëson shumë edhe mungesa e funksionimit të parlamentit, nuk ka vendimmarrje dhe nuk ka mundësi që të ndryshohet baza ligjore shpejt, por ka hapësirë dhe mundësi mbi bazën e një analize të mirëfillt që të kemi masa të përkohshme ose periodike në lehtësimin dhe në subvencionimin e sektorëve vitalë”, ka thënë Shala
Përpos kësaj, ngritje e çmimeve tjera janë paralajmëruar sikurse ai i energjisë elektrike, andaj deputeti opozitar vlerëson se qytetarëve po u vështirësohet jetesa.
“Në këtë fazë përveç naftës dhe çmimit të energjisë, ne rrezikojmë bazën e mirëqenies qytetare, rrezikojmë bazën e ekonomisë sonë, dhe rrezikojmë shumëçka nga prodhimtaria vendore, gjë që shteti është krejtësisht inekzistent në këtë fazë dhe praktikisht ne jemi nën mëshirën e lojës si me thënë moniste të një subjekti politik i cili është krejtësisht inferior apo i pandijshëm në raport me këtë krizë të përgjithshme ekonomike të vendit”, u shpreh tutje Shala.
Edhe Janina Ymeri nga Lidhja Demokratike e Kosovës thotë se nuk po ndihet dora e shtetit në këto ngritje çmimesh.
”Situata po injorohet plotësisht prej pushtetit, edhe pse nuk ka Kuvend funksional dhe Komisione funksionale, prapë se prapë ata është dashur të vijnë me një propozim qysh mundemi me zvogëlu rritjen e çmimeve të njëpasnjëshme të çmimeve të naftës, çmimet tavan nuk janë zgjidhje për shkak se rritet çmimi gjithmonë sipas importit… Transporti publik, emergjencat, kategoritë kyçe, bizneset duhet më së pari me u kujdes mos me u rritë çmimi i naftës pastaj çmimi për individë me qenë propozim ose akciza ose TVSH-ja”, ka thënë Ymeri.
Gjatë ditës, Ministria e Industrisë për tëvë1 ka treguar se janë duke kryer inspektime në gjithë vendin për të parë se a po respektohet çmimi tavan për shitjen e derivateve.
Ndërkohë, asnjë nga deputetët e partisë në pushtet nuk kanë pranuar të flasin lidhur me këtë çështje.
E Aleanca për Ardhmërinë e Kosovës të hënën ka kërkuar marrjen e masave të menjëhershme ku një nga to është lirimi i menjëhershëm së paku 50% nga TVSH-ja për derivatet.
