Avokati, Hasan Shala ka komentuar të ardhmen politike të Vjosa Osmanit pas përfundimit të mandatit të saj më 5 prill.
Ai, në emisionin “Ditari” në Tëvë1, ka thënë se Osmani mund t’i bashkohet Lidhjes Demokratike të Kosovës.
Sipas tij, bazuar në informacione jozyrtare, ajo mund të jetë edhe kandidate për kryeministre, duke udhëhequr listën e kësaj partie në zgjedhjet e ardhshme.
“Vjosa Osmani ka deklaruar vetë se, nëse nuk nominohet për presidente, do të jetë kundërshtare politike e Lëvizjes Vetëvendosje. Mendoj se opsioni më i afërt për të është t’i bashkohet Lidhjes Demokratike të Kosovës. Sipas disa informacioneve jozyrtare, Osmani mund të udhëheqë listën e LDK-së për kryeministre, duke iu bashkuar kësaj partie së bashku me grupin e saj. Unë shpresoj që kjo të ndodhë, pasi ajo ka qenë pjesë e LDK-së dhe të gjitha arritjet e saj politike lidhen me këtë subjekt. Besoj se rikthimi në LDK është alternativa më reale, pasi veprimi i vetëm në këtë fazë do ta kishte të vështirë të siguronte mbështetje të mjaftueshme, madje edhe për të kaluar pragun zgjedhor prej 5 për qind”, ka thënë Hasan Shala.
Ndryshe, më 5 mars ishte afati i fundit kur Kosova do të duhej ta zgjidhte presidentin, 30 ditë para skadimit të mandatit të Osmanit më 4 prill.
Seanca u ndërpre në mungesë të kuorumit, pasi në sallë mungoi opozita.
Në garë ishin Glauk Konjufca dhe Fatmire Kollçaku-Mullhaxha, të dy nga partia në pushtet, Lëvizja Vetëvendosje.
Si pasojë, kryetarja e Kuvendit, Albulena Haxhiu, i kërkoi Gjykatës Kushtetuese t’i pezullojë përkohësisht afatet kushtetuese për zgjedhjen e presidentit të ri./teve1.info/
