Autor: Driton Sadiku
Marrëveshja për të përfituar plot 882 milionë euro u ratifikua më 13 shkurt.
Por nga këto fonde nga plani i Rritjes së Bashkimit Evropian, Kosova ende nuk ka marrë asnjë cent.
Nga Blloku, në një përgjigje për tëvë1, thanë se deri tani, Kosova ka aplikuar për pjesën e parë të fondeve, si pjesë e parafinancimit, në vlerë prej 61 milionë euro.
Por cilat janë kushtet që vendi t’i plotësojë, që mjetet të barten?
“Sa i përket kushteve që duhet të përmbushë Kosova, kushtet e përgjithshme përfshijnë stabilitetin makroekonomik, menaxhimin e shëndoshë të financave publike, transparencën dhe mbikëqyrjen e buxhetit; ndërsa kushtet paraprake përfshijnë respektimin e mekanizmave demokratikë dhe angazhimin konstruktiv në normalizimin e marrëdhënieve ndërmjet Serbisë dhe Kosovës, në mënyrë që të mund të bëhet lëshimi i fondeve të paradhënies në kuadër të Planit të Rritjes”, thuhet nga BE.
Megjithatë, përveç kësaj, Kosova pritet të marrë edhe pjesën tjetër të mjeteve.
Por sipas profesorit universitar Jeton Kelmendi, ato zor që do mund të merren edhe për një kohë.
“Këto mjete nuk jepen menjëherë por në mënyrë sistematike dhe është një plan strategjik, Kosova bën pjesë në atë plan por që ishte vonuar. Besoj që kjo duhet të ndodh deri në fund të vitit të ardhshëm, gjithmonë në qoftë se nuk do të kemi ndonjë destabilitet që mund të vije në çdo moment i paparashikuar”, thotw Jeton Kelmendi – profesor.
Kosova është e vetmja nga vendet e Ballkanit perëndimor që s’ka përfituar nga fondi 6 miliardësh i Bashkimi Evropian që qëllim ka rritjen ekonomike dhe afrimin me BE-në.
