Këshilli për Marrëdhënie Shqiptaro-Amerikane (AARC) ka kërkuar që dialogu ndërmjet Kosovës dhe Serbisë të udhëhiqet nga Shtetet e Bashkuara të Amerikës, duke vlerësuar se procesi aktual nuk ka dhënë rezultate konkrete.
Kjo çështje u diskutua në një takim rreth dyorësh mes presidentit të AARC-së, Martin Vulaj dhe anëtarit të bordit Vehbi Bajrami, me zyrtarë të Departamenti Amerikan të Shtetit.
Sipas AARC-së, dialogu mes Kosovës dhe Serbisë ka hyrë në një fazë të tejzgjatur, me pak rezultate të prekshme në terren. Në takim u theksua se procesi ka zgjatur mbi 15 vjet, ndërsa progresi mbetet i kufizuar.
Vulaj deklaroi se mungesa e rezultateve lidhet edhe me mungesën e vullnetit nga pala serbe për një marrëveshje përfundimtare. Ai kritikoi gjithashtu qasjen e deritanishme të Evropës ndaj dialogut, duke e cilësuar atë si burokratike dhe joefektive.
Në këtë kontekst, AARC vlerëson se ndryshimi i qasjes është i domosdoshëm dhe se vetëm një proces i udhëhequr nga ShBA-ja mund të sjellë përparim real. Po ashtu, u ritheksua se njohja e ndërsjellë mbetet objektivi kryesor i dialogut dhe politikë zyrtare e ShBA-së.
