Futbollisti i Kosovës që luan te Hoffenheimi në Bundesligën gjermane, Fisnik Asllani ka qenë pjesë e një podcasti në gazetën gjermane “Bild.de” – ku tregoi arsyen se pse la Gjermaninë dhe zgjodhi Kosovën.
Asllani në këtë intervistë tregoi pse zemra i tha më shumë për fanellën “Dardane”.
“Intuita ime më tha se të luaja për Kosovën dhe ishte vendimi i duhur. Jam shumë i lidhur me atdheun tim. I kaluam të gjitha pushimet atje në Kosovë. Kam shumë familjarë”, u shpreh fillimisht 23-vjeçari
Asllani ishte pjesë e Gjermanisë në grupmoshat e reja, prandaj futbollisti nuk i harron të mirat që ia bëri vendi ku po jeton dhe vepron tani.
“Me gjithë mirënjohjen që natyrisht kam për DFB-në, sepse nuk do të isha lojtari që jam nëse nuk do të kisha kaluar nëpër të gjitha këto dhe nëse nuk do ta kisha shijuar të gjithë aventurën me Gjermaninë, që më bëri të mundur”, vazhdoi ndërkaq Asllani.
Kujtojmë se Fisnik Asllani pas kësaj jave vjen në Kosovë për t’u përgatitur për ndeshjen ndaj Sllovakisë, e cila luhet më 26 mars, e vlefshme për play-offin e Kupës së Botës 2026.
