Një burrë 81-vjeçar është gjetur pa shenja jete në banesën e tij në rrugën “Selajdin Berisha” në Prizren.
Lajmi është konfirmuar nga zëdhënësi i Policisë për rajonin e Prizrenit, Shaqir Bytyqi, i cili bëri të ditur se rasti u raportua nga familjarët, pasi i ndjeri nuk u ishte përgjigjur thirrjeve të tyre.
Sipas tij, njësitet policore kanë dalë menjëherë në vendin e ngjarjes dhe, për shkak se dera e shtëpisë ishte e mbyllur dhe nuk kishte reagim nga brenda, është ndërhyrë për hapjen e saj.
Brenda banesës është gjetur pa shenja jete viktima me inicialet J.B., i lindur në vitin 1944. Në vendngjarje kanë intervenuar edhe zjarrfikësit dhe ekipi emergjent, të cilët kanë konstatuar vdekjen.
Rastit i janë përgjigjur edhe hetuesit, ndërsa me urdhër të prokurorit të shtetit, hetimet do të vazhdojnë për sqarimin e rrethanave të vdekjes.
“Patrulla policore i është përgjigjur rastit dhe në vendin e ngjarjes ka kontaktuar me një familjar, i cili ka raportuar rastin. Meqenëse dera e shtëpisë ishte e mbyllur dhe nuk kishte asnjë përgjigje nga brenda, është përdorur forcë për hapjen e saj. Brenda objektit është gjetur viktima J.B., i lindur më 10.05.1944. Në vendngjarje kanë dalë njësitë e zjarrfikësve dhe ekipi i emergjencës, të cilët kanë konstatuar vdekjen e viktimës”, tha Bytyqi. /teve1.info/
