Personi që mbeti i plagosur nga të shtënat me armë zjarri në mëngjesin e sotëm në Gjakovë është në gjendje stabile shëndetësore.
Nga Emergjenca e Spitalit të Përgjithshëm “Isa Grezda” kanë bërë të ditur se i plagosuri po merr trajtim mjekësor në repartin e emergjencës dhe gjendja e tij aktualisht është stabile.
Ngjarja dyshohet të ketë ndodhur rreth orës 05:20 në një lokal në Çarshia e Vjetër e Gjakovës, ku sipas informatave të para pronari i lokalit, pas një mosmarrëveshjeje me një klient, ka përdorur armën e zjarrit.
Si pasojë e të shtënave, një person ka mbetur i vdekur në vendin e ngjarjes, ndërsa një tjetër është plagosur dhe është dërguar për trajtim në spital.
Zëdhënësi i Policisë për rajonin e Gjakovës, Lumni Graishta, ka deklaruar për teve1.info se i dyshuari është identifikuar dhe është person i njohur për policinë, por aktualisht ndodhet në arrati.
Sipas tij, njësitë policore janë në kërkim të të dyshuarit, ndërsa në vendin e ngjarjes po zhvillohen procedurat e nevojshme hetimore nën mbikëqyrjen e prokurorit të shtetit. /teve1.info/
