Me anë të këtij Udhëzimi është përcaktuar masa e fitimit të shitjes me pakicë dhe shumicë të derivateve.
Kështu, tregtarët e naftës që e shesin naftën me shumicë mund të fitojnë maksimalisht 2 centë, ndërsa ata që e shesin me pakicë, mund të fitojnë maksimalisht 12 centë.
Përveç kësaj, në udhëzim ceket edhe se si do të përcaktohet çmimi i naftës.
Çmimi maksimal nënkupton çmimin mesatar të furnizimit me produktin plus dymbëdhjetë cent.
Çmimi mesatar i furnizimit për dizelin nënkupton mesataren e çmimeve për litër me të cilën janë importuar dhjetë milionë litrat e fundit, me evidencë ditore nga Dogana.
Ndërsa çmimi mesatar i furnizimit për çdo karburant përpos dizelit nënkupton mesataren e çmimeve për litër, me të cilën janë importuar një milion litrat e fundit të produktit, me evidencë ditore nga Dogana.
Në një përgjigje me shkrim për televizionin, kryetari i Shoqatës së Naftëtarëve, Fadil Berjani ka thënë se naftëtarët ende nuk kanë mbajtur takim për të paraqitur qëndrimin e tyre karshi vendimit.
Vendimi mbetet në fuqi për 90 ditë përveç nëse shprehimisht përcaktohet ndryshe nga Qeveria. Udhëzimi hyn në fuqi një ditë pas publikimit në Gazetën Zyrtare.
Raporti i gazetarit Gojart Jashari.
