Nga ky vit qytetarët e Kosovës do ta paguajnë tatimin në pronë, të paktën për gjysmë më shtrenjtë.
Kjo pasi nga janari hyri në fuqi ligji i ri, i cili parasheh që tatimi të dyfishohet, ndërsa për pronat komerciale rritja mund të arrijë deri në 200 apo edhe 300 për qind.
Megjithatë, ani se kanë kaluar gati tre muaj nga kur hyri në fuqi, qytetarët ende nuk i kanë pranuar faturat e reja të tatimit.
Veçse me rritjen e paralajmëruar, assesi nuk po pajtohen.
“Barrë e rëndë se për një shtëpi me vijnë 70, 80 euro, p.sh vitin e kaluar kam pagu 37 euro tash dyfish po shkon 100shi”, tha qytetari Sabit Makolli.
“Shumë e rëndë është, po flasë për atë pjesën e popullsisë që është më e varfër, kemi pensionist,edhe vet jam pensionist, çdo send po shtrenjtohet e këta s’po bëjnë asgjë”, tha qytetari tjetër Zijanin Zeqiri.
Sipas ekonomistit Jakup Bellaqa, shteti s’do të duhej ta mbush buxhetin në kurriz të qytetarëve, por të gjejë forma të tjera.
“Duhet të ketë tatime të përshtatshme që nuk e dëmtojnë biznesin sepse nuk është zgjidhje të rriten tatimet për ta rrit buxhetin, por duhet të shtrihet baza tatimore që të sigurohen të hyrat e rregullta”, tha ekonomisti Jakup Bellaqa.
Andaj thotë se më e rrugës do ta shihte shfuqizimin ose pezullimin e këtij vendimi.
“Është dashtë të shtyhet zbatimi edhe për një kohë derisa të krijohet një stabilitet politik e institucional që thjeshtë të funksionojnë mekanizmat e shtetit derisa të fuqizohet ekonomia e Kosovës”.
Ministria e Financave me ligjin e ri kishte vendosur që tua falte nga 100 euro të tatimit në pronë qytetarëve.
Megjithatë, Gjykata Kushtetuese e rrëzoi këtë nen të ligjit, duke ua lënë në kompetencë komunave marrjen e këtij vendimi.
E shumica nga komunat vendosën të mos i falin këto borxhe, pasi thanë se do t’u dëmtohej buxheti.
Kronikë e realizuar nga gazetari Driton Sadiku.
