Po e lexon raportin e Komitetit Rajonal të Bashkimit Evropian.
Por në dokumentin mbi Paketën e Zgjerimit të BE-së 2025 për Ballkanin Perëndimor dhe Turqinë, drejtori i Asociacionit të Komunave të Kosovës, Sazan Ibrahimi, po vëren diçka të re.
Këtë herë, dallimi është që shteti i Kosovës po paraqitet pa fusnotë.
Ajo u largua në dokumentin e fundit të këtij institucioni.
Ky vendim i Komitetit Europian erdhi pas disa takimeve, thotë Ibrahimi.
Sipas tij, ky vendim është shumë i rëndësishëm për vendin.
Por Ibrahimi thotë se ka ende punë dhe kërkesa të njëjta kanë bërë edhe për organizata të tjera.
Vendimin e ka përshëndetur kryeministri i vendit, Albin Kurti.
“Duket që sivjet pranvera po vjen më herët dhe, siç u tha atëbotë, fusnota do të shkrihet si një fjollë bore. Ndoshta ishte gabim viti dhe qeveria. Por kjo po ndodh. Natyrisht që kemi ende trashëgimi të keqe nga ajo kohë dhe nuk do të duhej të entuziazmohemi tepër”.
Këtë lajm e ka mirëpritur edhe zëvendëskryeministri i parë dhe ministri i Punëve të Jashtme dhe Diasporës, Glauk Konjufca.
Por që ky veprim të konsiderohet sukses është banale, e thotë analisti politik, Korab Sejdiu.
Ai thotë se fusnota nuk do të duhej të ishte e vendosur fare.
“Pyetja është pse Bashkimi Evropian i ka vendosur atë fusnotë? Pse mekanizmat e BE-së e kanë vendosur atë fusnotë? Pyetja tjetër e rëndësishme është pse nuk ka vendimmarrje kolektive, pse nuk po na njohin pesë shtetet? Kjo do të ishte rezultat nëse na njohin pesë shtetet e jo pse hiqet fusnota. Kosova është shtet i pavarur, faktikisht është i pavarur, prandaj a hiqet a vendoset një fusnotë është jo fort serioze por në mungesë të një lajmi të mirë e pozitë për Kosovën, atëherë ky konsiderohet lajm pozitiv”.
Komiteti i Rajoneve jep opinione dhe rekomandime për legjislacionin e BE-së që prek nivelin lokal dhe rajonal.
Ka rreth 329 anëtarë që janë kryetar komunash, kryetarë rajonesh ose përfaqësues lokal nga vendet e BE-së.
