Anëtari i kryesisë së AAK-së, Ahmet Isufi, ka deklaruar se qëllimi i VV-së që nga zgjedhjet e shkurtit dhe dhjetorit të vitit 2025 ka qenë mbajtja e procesit të hapur pa gjetur zgjidhje për institucionet e vendit.
Isufi tha se synimi i VV-së është të sigurojë shumicën dhe sipas tij, vendi po shkon drejt zgjedhjeve të reja. Ai theksoi gjithashtu se votat për Lëvizjen Vetëvendosje do të bien për shkak siç u shpreh ai, manipulimeve dhe mënyrës së sjelljes ndaj opozitës dhe pushtetit.
Sipas tij, kryeministri Albin Kurti nuk ka bërë asnjë përpjekje për të gjetur zgjidhje për zgjedhjen e presidentit.
“Qëllimi I VV-së ka qenë që nga shkurti deri në dhjetor të vitit të kaluar ta mbajë procesin e hapur dhe mos të bëjë zgjidhje, po ashtu e njëjta po ndodh me presidentin ose presidenten e cila duhet të zgjidhet. Qëllimi i VV-së është që ta marrin shumicën për ata po na qojnë drejt zgjedhjeve, po që unë besoj që do të befasohen sepse do të bie vota në VV për shkak se po vërehen këto manipulime dhe mënyra e sjelljes me pushtetin dhe me opozitën. Asnjë tentativë se ka bërë për zgjedhjen e presidentit, po ta kishte bërë do të ish ul me të tre liderët e tjerë partive shtet-formuese dhe do të ish gjet një kompromis duke parë parasysh se pushtetet duhet të jenë të ndara. Roli i tij ish dashtë me qenë neutral dhe do të kishin mundur ta gjejnë, kanë gjete mënyrën se si të vijnë deri të kandidimi i Konjufcës në mënyrë që ta marrin pushtetin”, ka deklaruar ai në emisionin “Ditari” në Tëvë1.
Ai shtoi se një emër adekuat për postin e presidentit do të ishte vetëm nga familja Jashari, ndërsa sipas tij emrat e tjerë të përmendur nga LVV kanë qenë më shumë për opinionin publik.
Isufi theksoi se AAK do të votonte një kandidat për president vetëm nëse ai është unifikues, i paanshëm dhe që luan rolin e presidentit në politikën e brendshme të vendit.
“Përveç familjes Jashari që është përmendur për president, emrat e tjerë vetëm janë kalkuluar në opinion, por nuk ka pasur ndonjë propozim konkret deri në propozimin e Konjufcës që është bërë nga partia e VV-së dhe presidentja është mohuar, për neve si parti politike do të ishim në gjendje të japim votat nëse ish ardhur në shprehje një autoritet i cili vërtet është unifikues, i paanshëm dhe luan rolin e presidentit qoftë në politikën e brendshme duke pasur parasysh interesin e qytetarëve të Kosovës dhe të institucioneve”, ka theksuar ai.
Ndërsa, për raportin mes Kurtit dhe Osmanit, Isufi thotë se raportet mes të dy liderëve janë acaruar, duke theksuar se presidentja gjatë mandatit të saj iu ka nënshtruar kërkesave dhe interesave të Lëvizjes Vetëvendosje.
“Ne e shohim që janë acaruar raportet mes Kurtit dhe Osmanit dhe presidentes, normalisht ajo gjatë mandatit të saj që e thekson edhe vet iu ka përgjigj madje me nënshtrim atyre që kanë qenë interesa të VV-së dhe kryeministrit, ka bërë lëshime në dëm ndoshta të interesave të Kosovës, por megjithatë ne e konsiderojmë se në të ardhmen do të shihet se çfarë pozicionimi do të kenë partitë politike”, tha ai./teve1.info/
