Lëshim në organizim të ndeshjes, kërcënime me jetë ndaj gjyqtarëve dhe çka tjetër jo në Skenderaj në përballjen ku Drenica ndeshej me Dukagjinin. Dueli përfundoi 2-2, ndërsa për të kuptuar në të vërtetë se sa vështirë është të drejtosh një ndeshje në Kosovë – dhe atë Superligë – e jo për ligat tjera më poshtë, duhet pyetur: Lirim Jasharin (gjyqtar kryesor), Zgjim Rrahimin (nd. i parë), Faton Jakupin (nd. i dytë), Dylot Brahimi (gjyqtar i katërt) si dhe Genc Nuza (VAR) e Kastriot Peci (aVAR). Të gjithë këta zyrtarë të kësaj ndeshjeje.
Mëposhtë, njoftimi i plotë i FFK-së për inicimet e bëra ndaj FC Drenica dhe zyrtarit të saj.
“Ndaj: Përfaqësuesit zyrtar të KF “Drenica”, Granit Koci. Motivi: Në min 34 për sjellje jo sportive dhe duke kundërshtuar vendimet e gjyqtarit hyn në fushë për çka ndëshkohet me karton të kuq direkt dhe duke dalur nga fusha kërcënon asistenitin e parë.
Pas përfundimit të pjesës së parë edhe pse i përjashtuar hyn në korridoret e zhveshtoreve të gjyqtarëve shan, ofendon dhe kërcënon gjyqtarin kryesor me disa persona tjerë me fjalët: “Nëse nuk fitojmë ti nuk del i gjallë nga Skenderaj“. I njëjti edhe në pjesën e dytë shfrytëzon rastin dhe futet në fushë afër vijës dhe përsëri proteston për vendimin e gjyqtarit të parë edhe pse ishte i ndëshkuar me karton të kuq. Pas kësaj intervenohet dhe largohet nga stadiumi. Sipas raportit të personave zyrtar të ndeshjes Drenica –Dukagjni.
Ndaj: FC “Drenica”. Motivi: Lëshim në organizim të ndeshjes. Pas përfundimit të pjesës së parë në korridorrin e zhveshtoreve futen persona të pautorizuar të cilët ofendojnë dhe kërcenojnë gjyqtarët. Sipas raportit të personave zyrtar të ndeshjes Drenica–Dukagjni.”
Kujtojmë, FC Drenica është e fundit në renditjen tabelare të Superligës dhe është në rrezik për rënie. Kuqezinjtë nga Skenderaj kanë ndarë rrugët me trajnerët që nisën stinorin dhe aktualisht janë në dorë të gjermanit Thomas Brdaric. Me Brdaricin, Drenica ka arritur një fitore në shtatë ndeshje kampionale!
