Gjykata Themelore në Prishtinë, Departamenti për Krime të Rënda, ka shpallur aktgjykim dënues ndaj të akuzuarës N.M., e cila është dënuar me 20 vjet burgim për veprën penale “Vrasje e rëndë”.
Sipas njoftimit të gjykatës, në dënimin e shqiptuar do të llogaritet edhe koha që e akuzuara ka kaluar në paraburgim, ndërsa masa e paraburgimit i është vazhduar deri në plotfuqishmërinë e aktgjykimit, por jo më shumë se dënimi i shqiptuar.
“Me datë 20.08.2024, rreth orës 19:00, në rrugën ‘Ismet Krasniqi’ në Prishtinë, në korridorin e përbashkët të shtëpive, e akuzuara në mënyrë dinake dhe për motive xhelozie e kishte privuar nga jeta kunatin e saj, Xh.M., duke shtënë disa herë me armë zjarri në drejtim të tij”, thuhet në njoftimin e gjykatës.
Gjykata ka urdhëruar edhe konfiskimin e përhershëm të armës së zjarrit të përdorur në krim, ndërsa Policia e Kosovës është obliguar që pas plotfuqishmërisë së aktgjykimit të bëjë asgjësimin e saj.
Po ashtu, e akuzuara është obliguar të paguajë 200 euro shpenzime të procedurës penale dhe 50 euro për Fondin e Kompensimit të Viktimave të Krimit, brenda 15 ditësh nga momenti kur aktgjykimi të marrë formën e prerë.
Palët e pakënaqura kanë të drejtë ankese në Gjykatën e Apelit përmes Gjykatës Themelore në Prishtinë.
