Shefja e stafit të presidentes së Kosovës, Learta Hollaj, ka reaguar ndaj pretendimeve që kanë qarkulluar në publik për një skemë të organizuar nga presidentja Vjosa Osmani për rrëzimin e Qeverisë.
Përmes një reagimi publik, Hollaj i ka mohuar këto pretendime, duke i cilësuar ato si të pavërteta dhe të dëmshme për shtetin. Sipas saj, përpjekjet për ta paraqitur presidenten si pjesë të ndonjë plani për rrëzim të Qeverisë janë produkt i një mendësie që, për interesa të momentit, është e gatshme të dëmtojë edhe vetë shtetin.
Ajo theksoi se Osmani nuk ka qenë dhe nuk do të jetë pjesë e skenarëve të tillë, duke shtuar se për presidenten politika nuk është vend i komploteve, por përgjegjësi ndaj Republikës, Kushtetutës dhe qytetarëve.
Debati erdhi pasi gjatë ditës deputeti i Lëvizja Vetëvendosje, Enver Dugolli, akuzoi partitë opozitare Partinë Demokratike të Kosovës dhe Lidhjen Demokratike për përpjekje për skenarë politikë kundër kësaj partie dhe kryeministrit Albin Kurti.
Presidentja Osmani të premten nxori dekretin për shpërndarjen e Kuvendit, ndërkohë, zyrtarë të LVV-së përfshirë Kurtin, kanë theksuar nenin 82 të Kushtetutës, i cili parasheh që Kuvendi mund të shpërndahet nëse brenda 60 ditësh nga fillimi i procedurës nuk zgjidhet presidenti. Sipas tyre, ky afat ka nisur të rrjedhë më 5 mars, kur Kuvendi u mblodh por nuk zhvilloi votim për shkak të mungesës së kuorumit. LVV ka paralajmëruar se do ta dërgojë dekretin e presidentes në Gjykatën Kushtetuese. /teve1.info/
