E shtuna i solli në zyret e partisë.
Aty, anëtarë të Partisë Demokratike të Kosovës, mbajtën një konferencë për media.
Ashtu siç pritej, folën për situatën aktuale politike.
Fillimisht u tha se në gjendjen në të cilën ndodhet vendi, zgjedhjet janë opsioni i vetëm.
Ndërsa, për faktin se u dështua të zgjidhej një president, fajtor po lënë partinë në pushtet.
“Problemi është dëshira për ta kontrolluar çdo institucion të vendit, dëshira për t’i ushtruar çdo aktor të tjerë politik ndaj një mentaliteti autoritar, pra për ta kapur çdo institucion”, tha Tahiri.
Shefi i deputetëve të PDK-së, Arian Tahiri iu kundërpërgjigj edhe kryeministrit Kurti i cili të premten tha se PDK-ja kërkonte marrëveshje pa dhënë emra.
“Në momentin që z.Kurti ish pajtuar që kandidati dhe kundër kandidati me qenë prej PDK-së, pastaj kish qenë faza që ne të propozonim emra dhe jo me imponu emra, por të diskutohet bashkërisht se kush do të ishin emrat më të mirë”.
Andaj dekreti për shpërbërje të Kuvendit, sipas deputetit të kësaj partie, Përparim Gruda, është në përputhje me Kushtetutën.
“Kuvendi i Kosovës ka shkelur Kushtetutën me mosveprim duke mos zgjedhur presidentin brenda afatit kushtetues dhe për pasojë është shkelur Kushtetuta dhe pasoja e kësaj shkelje është shpërndarja e tij dhe shpallja e zgjedhjeve të reja”.
Sipas Grudës, afati 60 ditor që parasheh Kushtetuta, nuk vlen pas afatit 30 ditor që parashihet për zgjedhjen e presidentit.
“Afati 60 ditor shërben kryesisht për situata kur posti i presidentit mbetet vakant si në situata kur ai jep dorëheqje, shkarkohet apo vdes dhe në këto raste nuk mund të zbatohet afati prej 30 ditëve sepse ai lidhet me përfundimin e rregullt të mandatit të presidentit”.
Kësisoj në PDK janë të bindur se Gjykata Kushtetuese do t’i rrëzojë ankesat e Lëvizjes Vetëvendosje, për çka thanë se do të dorëzojnë edhe komentet e tyre që veçse janë kërkuar nga organi më i lartë kushtetues.
Kronikë e realizuar nga gazetari Driton Sadiku.
