I shqyer me thikë, përfundoi flamuri turk i vendosur në tendën e iftarit në Mitrovicë.
Dëmtimin e flamurit e vërejtën anëtarët e organizatës Eyup Sultan Vakfi, kur si çdo ditë po bën përgatitjet për iftar.
Me të parë gjendjen, ata njoftuan policinë.
“Kur shkuam në çadër, po zbarkonim ushqimet, sepse ushqimet tona nga Prishtina në Mitrovicë dërgohen çdo ditë në ora tre. Kur erdhëm në çadër, një mik erdhi, na përshëndeti, i thamë urdhëroni, tha që flamurin turk e kishin shqyer. I thashë që është e pamundur. Dolëm jashtë, u tronditëm, flamurin turk e kishin shqyer me thikë. U dëshpëruam, i njoftuam policinë, erdhën dhe u morën me rastin”, tregoi koordinatori Naser Janova.
Flamuri i shqyer u zëvendësua me një të ri.
Mirëpo, Naser Janova tregon se edhe flamuri i ri u dëmtua përsëri.
“Flamuri i dytë turk që e vendosëm, një ditë më pas, nga një a disa njerëz ishte shqyer me thikë. U dëshpëruam, njoftuam policinë, dhe faleminderit ndaj policisë u morën me rastin, kërkuan që të ngremë flamurin. E vendosëm flamurin e ri, dhe pranë flamurit vendosën dy policë rojtarë, e kjo nga gëzoi edhe më shumë që kjo ngjarje s’do të ndodhë më”.
Rasti tashmë është duke u hetuar nga organet e rendit.
E Janova, ka një lutje pë rata që e shkaktuan këtë dëm.
“Vetëm një lutje e kam tek ata – ne, turqit dhe shqiptarët jemi vëllezër, Turqia dhe Kosova janë vëllezër. Së bashku, në një ambient të përbashkët, jemi krenar që po shtrojmë iftarin. Bëjmë lutje te Allahu që diçka si kjo mos të përsëritet më”.
Organizata Eyüp Sultan Vakfi ka 19-të vite që shtron iftare pa pagesë në Kosovë.
