Kriza ka prekur thellë Sigal Prishtinën, klubin më të trofeshëm në vend, që tani pas 22 xhirove, është e parafundit dhe në garë të ngushtë për mbijetesë.
Humbja të enjten në kryeqytet nga Ylli, ishte disfata e 14=të sezonale, dhe e pesta rresht në kampionat. Më shumë humbje se bardhekaltrit ka vetëm Rahoveci, 15, që është i fundit në tabelë.
Deri në fund të sezonit të rregullt në Superligën e basketbollit, kanë mbetur edhe gjashtë ndeshje, ndërsa Prishtina që është e parafundit në tabelë, ka 30 pikë. Aq sa ka edhe Vëllaznimi i gjashti dhe vetëm një më shumë se skuadra e fundit në tabelë.
Ndryshimet e fundit në kryesi, problemet financiare dhe ato me tifozë, kanë prekur rëndë klubin e njohur të basketbollit, që po lufton ashpër me mbijetesën, si asnjëherë më parë.
Fitorja e fundit e skuadrës ishte ndaj Rahovecit, më 24 janar. Në fakt klubi prishtinas ka vetëm këtë fitore, që kur nisi viti i ri.
Në vikend, Prishtina luan kund rivalit lokal, Borës, që në këtë edicion ka befasuar të gjithë me paraqitje dhe pozicionim. Bora është e treta në tabelë, dhe në kurs të mirë për të luajtur në Play-Off, që do të ishte arritje historike për skuadrën që u themelua vetëm 4 vjet më parë.
Duelet e fundit të pjesës së rregullt të kampionatit, do të definojnë pozicionet e skuadrave, që do të sigurojnë Play-Offin dhe atyre që do të largohen e luajnë në barazh, duke qenë të përfshira pesë skuadra. Vetëm Trepça e bashkimi janë të sigurta në rrugën drejt Play-Offit, derisa skuadrat e tjera dhe renditja e tyre varen shumë nga duelet e radhës.
Përveç ndeshjes Bora – Prishtina, në këtë fundjavë zhvillohen edhe, Rahoveci 029 – Bashkimi, Golden Eagle Ylli – GO+Peja, dhe Trepça – Vëllaznimi.
