Vjosa Osmani duket se i ka ditët e numëruara në pozitën e Presidentes së Kosovës.
Ndryshe nga katër vite më parë, Osmani nuk e gëzon mbështetjen e Lëvizjes Vetëvendosje, që sërish ka bindshëm shumicën e ulëseve në Kuvend.
Raportet e ftohta mes kryeministrit Albin Kurti, dhe Presidentes Osmani, ranë në sy edhe në seancën solemne për epopenë e UÇK-së.
Kurti se përshëndeti fare Osmanin.
Megjithatë, ndonëse ftohtë, të dy u panë duke shtrënguar duart në kazermën Adem Jashari.
Autor: Driton Sadiku
Kjo nuk është krisja e parë e raporteve, mes dy krerëve të shtetit.
Në disa raste përgjatë mandatit të saj, Presidentja ishte goxha kritike ndaj kryeministrit Kurti.
Çarja më e madhe do të vinte në pranverën e 2024-tës, pas letrës për asociacionin që qeveria e dërgoi në Këshillin e Evropës, pa njoftuar fare Osmanin.
Atë kohë arsyetimi i ekzekutivit ishte se Presidentja qe jashtë vendit. Mirëpo, arsyetimin Osmani e konsideroi absurd, pasi tha se mund të konsultoheshin edhe përmes telefonit
Kritika, Presidentja pati edhe për dobësim të aleancave ndërkombëtare.
Mollë sherri mes Osmanit e Kurtit u bë edhe iniciativa për hapjen e urës së Ibrit, gjë për të cilën Osmani tha se veprimi pa koordinim me NATO-n, rrezikon prishjen e raporteve.
Presidentja, nuk u pajtua as me vendimin e qeverisë për tarifën doganore ndaj SHBA-së, gjë që qoi në përplasje përmes rrjeteve sociale mes përfaqësuesve të presidencës e të qeverisë.
Por pavarësisht krejt mospajtimeve të dyshes, vlerësohet se Kurti nuk u tregua korrekt në raport me të parën e shtetit.
“E ka pasur për obligim moralo-politik vetëvendosje ndaj Vjosa Osmanit për arsye që ka meqë njëra prej shefeve të shtetit që në vazhdimësi ka ndjekur vullnetin politik të Albin Kurtit”, shprehet politologu Albinot Maloku.
E enjtja është dita e fundit e afatit kushtetues, që vendi të bëhet me President të ri.
Osmani prej kohësh ka bërë publik synimin e saj, që në zyrën e të parit të shtetit të qëndroj edhe për katër vite të tjera.
