Kryetari i Partisë Demokratike të Kosovës, Bedri Hamza, në seancën solemne të Kuvendit të Kosovës kushtuar Epopeja e UÇK-së, e nisi fjalimin duke përshëndetur Rifat Jashari dhe familjen Jashari.
Ai gjithashtu përshëndeti Vjosa Osmani, Albin Kurti, deputetët dhe mysafirët e pranishëm në seancë.
Në fjalën e tij, Hamza theksoi se tri ditët e fillim-marsit të vitit 1998 nuk përfaqësojnë vetëm një betejë historike, por një mësim të përhershëm për kuptimin e lirisë.
Sipas tij, më 5, 6 dhe 7 mars të vitit 1998 një familje shqiptare vendosi të qëndrojë në pragun e shtëpisë së saj përballë një ushtrie pushtuese, duke ndryshuar përgjithmonë rrjedhën e historisë së Kosovës.
Hamza tha se ato tri ditë treguan se historia nuk shkruhet vetëm nga fuqia ushtarake apo kalkulimet politike, por nga vendimet morale të njerëzve që refuzojnë të nënshtrohen.
Ai shtoi se në ato ditë të marsit, Prekaz nuk ishte më vetëm një fshat, por u shndërrua në altar të lirisë, ndërsa familja Jashari në simbol të ndërgjegjes dhe qëndresës së një populli të tërë./teve1.info/
