Në gjykatore erdhi ta rrëfejë përjetimin e luftës.
Halit Rugova, është dëshmitar në gjyqin për krime lufte kundër Momir Pantiq dhe Zharko Zariq.
Ai para trupit gjykues tregoi se si shkaku i luftës, lagjja e tij i kishin tubuar personat më të moshuar në një shtëpi.
Në mesin e tyre edhe dy prindërit e tij.
Por për ta, fundi qe tragjik.
“U ni një muzikë në xhaminë e fshatit Kaliqan, në gjuhën serbo- kroate. Atëherë kur është terru, na jemi hy kadale. Aty i kemi pa disa lëvizje në shtëpinë e nalt, në krye të fshatit. na jemi hy të shtëpia ku i kemi lanë prindërit. Drita nuk ka pasë, e kom dhezë një shkrepsë edhe i kom pa prindërit e vramë. Na mendum m’i tërhjek, por ishte rrezik”, tha Halit Rugova- dwshmitar
Kjo nuk përfundoi me kaq.
Pas përfundimit të luftës, me kthimin e tyre në vendlindje, ata gjetën gjithçka të djegur.
“Kur jemi kthy prej Shqipërie, e kemi gjetë shtëpinë e djegur, edhe prindërit e djegur. Ma vonë e kemi marrë vesh, që janë vra 34 veta atë natë”, tha dëshmitari.
Përpos prindërve, në luftë Rugova humbi edhe familjarë të tjerë.
“Ma vonë e kam marrë vesh që aty ka qenë edhe mixha e disa kusherinjë, por nuk kanë qenë bashkë me prindërit e mi”, tha Rugova.
Dyshimet e tij dhe të gjithë bashkëfshatarëve të tjerë, janë se prapra këtyre vrasjeve qëndron policia serbe.
“Dyshoj për nja 90%, sipas informatave kanë qenë ushtri, njësi paramilitare”, tha dëshmitari Halit Rugova.
Ai kujton se edhe përpara viteve 98-99, Zariq ishte përgjegjës për një stacion policor, kur ishin vrarë tre persona.
“Zharko Zariq ka qenë polic, kurse në vitin 92 ka qenë përgjegjës për stacionin policor në Rakosh, ka qenë në kohën kur janë vra tre dëshmorët e Uçës”, tha ai.
Momir Pantiq në cilësinë e ish kryeshefit të stacionit policor në Istog dhe Zharko Zariq në cilësinë e ish policit, akuzohen për krime lufte në komunën e Istogut.
Sipas aktakuzës, këta dy janë përgjegjës për vrasje, keqtrajtime, plaçktije e djegie të shtëpive të popullsisë civile.
