Ka filluar radha e dëshmitarëve të parë në gjyqin e dytë ndaj Hashim Thaçit.
Ai bashkë me të akuzuarit e tij, Bashkim Smakaj, Fadil Fazliu, Isni Kilaj e Hajredin Kuçi, betejën me Zyrën e Prokurorit të Specializuar për akuzat për pengim të drejtësisë, e nisën pikërisht me një punonjës së kësaj zyre.
Në cilësinë e dëshmitarit të mbrojtur, punonjësi i ZPS-së tregoi se të gjitha hetimet që kjo zyre ka bërë nën pretendimet për ndëryrhje në drejtësi, lidheshin me çështjen për krime lufte, me të akuzuar, Thaçin, Veselin, Krasniqin e Selimin.
“Kishim disa hetime për pengim të drejtësisë, unë nuk e dija se sa çështje në fakt do të materializoheshin për pengim të drejtësisë, si përfundim patëm vetëm tre çështje për pengim dhe unë nuk mund të ua specifikoj ju sa burime kemi pasur ne për çështjen 10, 12 apo 11. Edhe të gjitha këto ishin të ndërlidhura me çështjen 06”, tha dëshmitari.
Ai u mor në pyetje nga mbrojtja e Thaçit, e cila kërkoi konfirmime në lidhje me personat e intervistuar nga prokuroria.
“A është e saktë që zotëri Rrustem Mustafa dhe zotëri Bislim Zyrapi janë intervistuar nga ZPS-ja lidhur me ndërhyrjen e pretenduar?, pyeti Sophie Menegon-avokate e Thaçit.
“Po, jam në dijeni”, u përgjigj dwshmitari
Dëshmitari konfirmoi se Zyrapi kishte pranuar që të intervistohej nga ZPS-ja.
“A pajtoheni me mua që vet zotëri Zyrapi publikisht ka pranuar që të intervistohej prej ZPS-së?”, pyeti avokatja.
“Po, pajtohem me ju”, tha dëshmitari.
Tutje, dëshmitari përmes përgjigjeve tregoi se dëshmitarët mbaheshin të informuar në vazhdimësi në lidhje me çështjen e Thaçit, Veselit, Krasniqit e Selimit.
“A është e vërtetë që dëshmitarët e çështjes 6-të kontaktoheshin rregullisht prej ZPS-së që të përditësoheshin në lidhje me ecurinë e çështjes së 6-të?”, ishte pyetja e avokates.
“E saktë”, tha dëshmitari.
Pyetja e avokates. Për shembull ZPS-ja synonte t’i thërriste ata?
Dwshmitari u përgjigj me “Po”
“Pra, ata janë kontaktuar për tu informuar se kur do të fillonte çështja, gjykimi i ZPS-së, kur pritej?”, pyeti avokatija.
“E saktë”, u përgjigj dëshmitari.
Të martën, gjyqi do të vazhdojë me dëgjimin e dëshmitarit të dytë në këtë çështje.
