Izraeli ka mbyllur pikën kufitare Rafah të Gazës me Egjiptin, për shkak të sulmeve të përbashkëta izraelito-amerikane ndaj Iranit.
“Janë zbatuar disa rregullime të nevojshme sigurie, përfshirë mbylljen e kalimeve në Rripin e Gazës, ndër të cilat edhe Kalimi i Rafah-ut, deri në njoftim të mëtejshëm”, tha në një deklaratë të cituar nga Al Jazeera, Koordinatori i Aktiviteteve Qeveritare të Izraelit në Territore (COGAT).
Kalimi kufitar në Rafah, i vendosur në kufirin jugor të Gazës, ishte rihapur vetëm muajin e kaluar, duke lejuar një numër të kufizuar palestinezësh të largoheshin për herë të parë pas disa muajsh, përfshirë pacientë që kishin nevojë urgjente për kujdes mjekësor.
Kalimi konsiderohet jetik për ofrimin e ndihmës humanitare dhe evakuimin e pacientëve në gjendje kritike.
Pothuajse e gjithë popullsia e Gazës prej më shumë se dy milionë banorësh u zhvendos gjatë luftës gjenocidale të Izraelit në territor, dhe enklava mbetet shumë e varur nga ndihma humanitare.
Në mesin e shkurtit, Kombet e Bashkuara thanë se vazhdonin të përballeshin me pengesa në shpërndarjen e ndihmave shpëtuese në Gaza.
